Gitandi ni ACT Teachers party-list Rep. France Castro si Vice President Sara Duterte sa usa ka lukos nga nagabuga og ata kun morag maipit sa sitwasyon.
Dungan kini sa gipahigayon nga hearing sa Committee on Appropriations sa House of Representatives alang sa budget sa Office of the Vice President.
Kini human nga mibalibad si Vice President Sara nga tubagon ang mga pangutana kabahin sa paggamit sa iyang opisina sa confidential funds (CFs).
Gihingusgan ni Duterte nga dili siya mutubag aron depensahan ang budget og gibutyag nga nakig-alayo na kini sa Commission on Audit kabahin sa notice of disallowance.
Apan nagtuo si Castro nga gusto lang ni Duterte nga likayan ang mga pangutana kabahin sa kung asa niya gigasto ang budget.
Sumala kang Castro, dili pwede ang maong taktika sa vice president tungod budget ang ginaistoryahan og katungod sa publiko nga masayran kung paunsa gigasto ang P125 million nga kwarta.
Ang pahayag ni Castro kabahin sa nukos human usab sa paghisgot ni Duterte sa conviction ni Castro sa kaso nga child abuse nga kabahin sa iyang ginaalegar nga pag-rescue sa kabatan-unan nga lumad sa Talaingod, Davao del Norte.
Isip tubag, gipangutana ni Duterte si Marikina 2nd District Rep. Stella Quimbo nga mao ang senior vice chair sa appropriations panel nga nag-preside sa Office of the Vice President (OVP) budget deliberations kun nganong gitugotan niini ang magbabalaud nga maghimo og side comments batok kaniya apan ginapugngan usab siya nga maghata og statements kabahin sa conviction ni Castro.
Sa ulahi, mayorya sa mga miyembro sa panel ang nagboto pabor sa mosyon gikan kang Gabriela party-list Rep. Arlene Brosas nga panason sa rekord ang statements kabahin sa conviction ni Castro.
Apan ang motion usab nga paphaon sa record ang pahayag ni Castro kabahin sa nukos ang gi-overrule.
Ang tensyon sa hearing ang nag-init dihang mibalibad si Duterte nga magtubag sa pipila ka pangutana.
Gi-request usab ni Duterte nga bayluhan si Quimbo isip presiding officer nga gitubag usab ni Quimbo nga ang pagpahawa sa presiding officer sa usa ka Congressional hearing ang dili sakop sa poder sa Vice President.
Base usab sa submission sa Commission on Audit nga gipagawas ni Rep. France Castro sa deliberasyon sa OVP budget, ania ang gi-gastuhan ni Vice President Sara Duterte sa P125 million nga confidential funds sa 11 ka adlaw sa 2022;
*Purchase of information – P14M
Payment of reward – P10M
Rental and other incidental expenses relative to the maintenance of safe houses – P16M
Purchase of supplies – P35M
Provision of medical and food aid – P40M
Payment of incentives for traveling related to confidential operations – P10M
Samtang, gi-defer usab sa House committee on appropriations ang deliberasyon sa Office of the Vice President nga 2 billion proposed budget alang sa 2025 taliwala sa pagbalibad ni Sara Duterte nga mutubang sa mga pangutana.
Gihimo ni Zambales Representative Jeff Khonghun ang motion to defer, og nagpadayag og pagkadismaya kang Duterte.
Natigayon ang mosyon nga walay objections og gitakda ang budget deliberations sa Septyembre 10.
