GENERAL SANTOS CITY – Padayon pang gi-imbestigahan sa Tupi Municipal Police Station ang natigayong pagpamusil patay atul sa Martes Santo sa usa ka pulis sa Prk. Santa Lucia Polonuling, Tupi, South Cotabato.
Sakop ni PCInsp. Bernie Paldas, chief of police sa maong presinto ang biktima nga nailhan nga si SPO4 Benedicto Gonzaga, 54, residente sa Polomolok South Cotabato.
Gibutyag ni Paldas, natigayon ang insidente kagahapon alas 2:30 sa hapon, dihang pauli ang biktima sa ilang balay gikan sa presinto aron mag-ilis ug uniporme alang sa pictorial tungod ga-asikaso ang nasampit sa iyang pagretiro.
Matud sa opisyal, pag-abot sa National Highway Prk. Santa Lucia Polonuling, gipusil sa riding in tandem ang biktima kausa ka higayon gamit ang caliber 45 pistol igo sa ulo hinungdan nga natumba sa maneho nga Honda wave kulay itim og pula nga may plate number 8391 ML.
Giduolan sa gunman ang biktima dayon gidul-it pagpusil sa ulo og liog hinungdan sa hinanaling kamatayon.
Sa pamahayag ni Paldas, walay dala nga issued firearms si Spo4 Gonzaga tungod giturn-over sa kauban una mipahawa sa presinto.
Ang ilang patrol car ang nagdala niini sa Tupi Municipal Hospital apan gideklarang Dead on arrival.
Gituohan sa kapulisan nga pipila ka metro ang distansiya gikan sa police station, gisundan ang biktima sa wala mailhing suspek og dihang nakakuha og oportunidad, gipusil ang nasampit pag-abot sa Prk. Santa Lucia Polonuling.
Samtang, blangko pa ang Tupi Municipal Police Station sa motibo o ilhanan sa mga suspek nga responsable sa pagpusil patay kang SPO4 Gonzaga, kinsa team leader matud pa sa patrol team sa maong presinto.
Giangkon ni PCInsp. Paldas, nga nakurat sila sa pagpusil patay sa iyang sakop.
Matud pa niini, dugay ng na-assign sa Tupi si SPo4 Gonzaga ug wala pay nahibaluan nga adunay nasuko sa nasampit tungod usa ka maayong tawo.
Gibutyag pa ni Paldas nga wala usay nasulti kaniya si SPo4 Gonzaga nga adunay bahad sa kinabuhi una kini gipusil.
Hinungdan nga pagkakaron wala pa silay ma-establisar nga mga anggulo alang sa pagtumbok sa motibo sa krimen. Sa pamahayag ni Paldas nga giaktakda ng magretiro si Spo4 Gonzaga.
Basi sa mga nakalap sa mga residente sa lugar, nakatabon matud pa ang mga nawong sa mga suspek nga sakay sa motorsiklo. Ang mga nasampit ang nagpangidaron og 20 – 35 anyos.
Human ang gipusil ang biktima, paspas nga mipalayo paingon sa Polomolok South Cotabato og wala na maabtan pa sa nagresponding mga pulis.
