Human namulong nga andam mutambong sa Quad Committee si kanhi Pangulo Rodrigo Duterte ug nahimo usab ang pormal nga pag-imbita kaniya ni Rep Ace Barbers aron tubagon ang mga pangutana kalabutan sa kampanya niini sa druga dihang siya pa ang Pangulo sa nasud.
Inoras na lamang ang gipaabot sa kadaghanan samtang naghinam hinam usab nga makita ang kanhi Pangulo nga mutambong sa pagdungog migawas ang balita nga dili mahinayon ang pagtambong ni Duterte sa imbestigasyon.
Kini human nagsulat si Atty Martin Delgra, legal counsel sa kanhi Pangulo ngadto kang Rep Robert Ace Barbers, Chairperson sa Committee on Dangerous Drugs ug Co Chair Joint Committee sa House of Representatives.
Gikumpirma ni Atty Delgra nga nadawat sa kanhi Pangulo ang sulat ni Barbers Oktobre 18.
Gisaysay sa abogado nga andam ang iyang kliyente nga mutambong sa hearing sa Oktobre 22 apan mubo lamang kaayo ang higayon aron makapangandam gawas pa nga Oktobre 17 lamang miabut ang kanhi Pangulo gikan sa kauluhan nga nanginahanglan usab ug paigo nga pahulay gumikan sa iyang edad.
Hinuon abli matud pa ang kanhi Pangulo human sa Nobyembre 1 aron mutambong sa pagdungog.
