Giingong adunay gahum ang Senate Impeachment Court sa pagdesisyon sa isyu sa 2/3-vote threshold alang sa conviction o acquittal ni Vice President Sara Duterte, sumala sa House Prosecution panel.
Matud ni Rep. Chel Diokno, dili ang 2/3 requirement ang gikuwestiyon sa prosecution kondili ang denominator o gidaghanon sa mga senador nga mahimong basihan sa maong boto.
Gibalik ni Diokno ang panan-aw sa upat ka amici curiae nga matud pa niya wala mag-ingon nga ang 16 votes usa ka absolute o dili mausab nga numero.
Samtang, giingon sa defense team ni VP Sara nga apil gihapon sa threshold ang mga senator-judge nga absent o dili makahimo sa pag-apil sa impeachment proceedings.
Matud ni Atty. Michael Poa, adunay record ang korte sa tanang nahitabo sa proceedings nga mahimong repasuhon sa mga absent nga senator-judge, ug mahimo usab silang mag-abstain kung dili sila makahatag og fair nga boto.
Sa ulahi, kadaghanan sa mga senator-judge mipabor sa mosyon ni Sen. Erwin Tulfo nga hisgutan ug botohan ang posibleng pagbag-o sa denominator sa 2/3-vote threshold, diin posibleng dili iapil ang mga senator nga detained, dili matino kung asa, o dili makapartisipar tungod sa medical condition.
