Lima ka semana human sa pagkamatay sa Pro wrestling legend nga si Hulk Hogan niadtong Hulyo 24, 2025, ang iyang lawas nagpabilin pa gihapon sa usa ka funeral home sa Clearwater, Florida.
Wala pa kini gicremate samtang ang pamilya nagpaabut pa ug klaro nga tubag sa mga pangutana kabahin sa hinungdan sa iyang kamatayon.
Kini bisan giingong atake sa kasingkasing ang hinungdan sa iyang kamatayon.
Ang anak niyang si Brooke Hogan, uban sa bana nga si Steve Oleksy ang mibisita sa funeral home aron personal nga makita ang lawas sa iyang amahan. Ang tuyo mao ang pagsiguro kung tinuod nga wala pa kini gicremate ug kung nahimo na ba gyud ang autopsy.
Human sa iyang personal nga pagtan-aw, niingon si Brooke nga nagtuo siya nga walay foul play nga nahitabo.
Gitun-an sa otoridad ang alegasyon nga posibleng adunay medical malpractice nga nakatampo sa pagkamatay ni Hogan.
Ang asawa ni Hulk Hogan nga si Sky Daily, miingon nga wala pa nila gipacremate ang lawas tungod kay gusto nilang masiguro una nga klaro ang tanan kabahin sa medical ug legal nga isyu.
Human niini, ilang tumanon ang personal nga kabubut-on ni Hogan nga ipa-cremate ang iyang lawas.
