COTABATO– Kapin sa P15.7 million nga kantidad sa smuggled nga sigarilyo ang nasakmit sa Police Regional Office 12 (PRO 12) atol sa gipahigayong checkpoint operation sa Panatan Border, Pigcawayan, Cotabato kagahapon sa hapon.
Matod ni PBGen. Arnold P. Ardiente, ang bag-ong lingkod nga Regional Director sa PRO 12, duha ka wing van trucks nga adunay karga nga gibanabana nga 400 ka kahon o mga 20,000 ka ream sa Fort ug Berlin brand nga sigarilyo, ang na-intercept sa mga personahe sa Regional Mobile Force Battalion 12 (RMFB 12), uban pang police units, Pigcawayan Municipal Police Station katambayayong ang Bureau of Customs (BOC). Unom ka mga suspek gikan sa Zamboanga Sibugay ug Ozamiz City ang nasikop human sila nasakpang walay saktong dokumento sa ilang kargamento.
Ang nakumpiska nga kontrabando adunay kinatibuk-ang market value nga P15,716,000 sumala sa BOC.
Ang malampuson nga operasyon resulta sa hugot nga direktiba ni Acting Chief PNP, PLtGen Jose Melencio C Nartatez Jr., batok sa smuggling ug uban pang ilegal nga pamatigayon nga naghulga sa ekonomiya ug panglawas sa katawhan.
Sa pagkakaron, anaa sa kustodiya sa kampo sa PRO 12 Camp sa Tambler Gensan ang mga nakumpiska nga sigarilyo uban sa duha ka wing van truck alang sa tukmang dokumentasyon ug disposisyon sa BOC.
Sa laing bahin, ang mga dinakpan gikatakdang pasakaan og kasong kalapasan sa Republic Act 10863 o Customs Modernization and Tariff Act ug Republic Act 10643 o ang Graphic Health Warning Law.
