Kapin sa ₱337,000 nga kantidad sa gidudahang ilegal nga droga ang nasakmit sa Police Regional Office 12 (PRO 12) isip kabahin sa padayong operasyon batok sa kriminalidad sa rehiyon.
Base sa Daily Operational Accomplishment Report sa PRO 12, nakahimo ang kapulisan og upat ka operasyon batok sa ilegal nga droga nga misangpot sa pagkadakop sa 10 ka suspetsado ug pagkumpiska sa 49.68 grams nga gidudahang shabu.
Gawas niini, nadakpan usab sa PRO 12 ang pipila ka wanted persons lakip ang usa ka Top 10 Most Wanted Person, duha ka Most Wanted Persons ug upat ka ubang wanted individuals.
Padayon usab ang operasyon batok sa loose firearms diin duha ka tao ang nadakpan, duha ka armas ang nasakmit, lima ka armas ang boluntaryong gitugyan, ug usa ka eksplosibo ang narekober.
Sa kampanya batok sa smuggling, lima ka tao ang gidakop ug kapin ₱27,000 nga kontrabando ang nasakmit, samtang adunay usab nakuhang ebidensya sa illegal logging nga nagkantidad og ₱3,050.
Samtang, 908 ka mga nakalapas sa lokal nga ordinansa ang natala, diin 241 ang gipamulta ug 667 ang gihatagan og pahimangno.
Matud sa PRO 12, ipadayon nila ang mga operasyon aron mapalig-on ang kalinaw ug seguridad sa tibuok rehiyon.
