Gipasiguro sa kapulisan nga padayon ang ilang pagbantay ug paghatag og seguridad sa mga eskwelahan, ilabi na human sa sunod-sunod nga insidente sa pag-atake nga nahitabo sa ubang eskwelahan sa nasud.
Matod ni PLtCol. Rexor Jake Canoy, aduna’y mga pamaagi nga mahimong itudlo sa mga estudyante aron mahibal-an nila ang angay buhaton kung adunay mahitabong insidente sama sa pagpamusil o uban pang insidente sulod sa eskwelahan. Lakip niini ang pagpatuman og mga drill o simulation para sa gitawag nga active attack incidents.
Apan, wala pa hingpit nga matino ang pamaagi sa maong drill tungod kay gikonsiderar sa kapulisan ang posibleng epekto niini sa mga estudyante.
Matod ni Canoy, posible nga dili makatabang kung aktuwal nga magpabuto og armas isip kabahin sa simulation, tungod kay mahimo hinuon kini nga makahatag og trauma o dakong kahadlok sa mga bata.
Samtang, kabahin sa security measures sa kapulisan ang pagbutang og mga pulis sa mga eskwelahan.
Matod ni Canoy, sa wala muabot ang estudyante sa eskwelahan aduna na’y mga pulis nga naka-duty sa mga tulunghaan aron magmonitor ug moresponde dayon kung adunay insidente.
Gimandoan ang mga police station nga magpadayon sa information drive ug paghatag og mga awareness alang sa mga estudyante, ilabina tungod sa mikaylap nga mga social media threat batok sa mga tulunghaan sa dakbayan.
Sumala kang PLtCol. Luis Pederio, tumong niini nga mahatagan ang mga estudyante og hustong kahibalo kung unsaon paglikay sa peligro ug unsa ang angay nilang buhaton kung adunay emerhensiya sulod sa eskwelahan.
Giawhag usab ang mga estudyante ug school personnel nga ireport dayon sa kapulisan o sa administrasyon sa eskwelahan ang mga hulga nga makita sa social media aron masusi ug maaksiyonan sa hustong paagi.
Padayon usab ang koordinasyon sa kapulisan ug mga eskwelahan aron mapalig-on ang seguridad ug malikayan ang posibleng insidente.
