GENERAL SANTOS CITY – All-set na ang pagpangandam alang sa ipahigayon nga fluvial parade alayon sa Sto. Niño de Bula sa Enero 15, adlaw’ng Dominggo.
Base sa gipahigayong briefing kagahapon sa hapon nga gipangunahan sa fishing magnate nga si Mr. Marfin Tan, alas-5:00 may ipahigayon nga misa, dayon pagka-alas-6:00 sa buntag mao ang assembly time, kung asa isakay na ang imahe ni Sr. Sto. Niño sa amphibian nga gipanag-iyahan sa NH-Agro Industrial Corporation ug mularga paingon sa Congson sa dagat kung asa nagpaabot ang ubang mga panagatan nga makigdungan sa parada.
Ug pagka-alas-7:00 sa buntag sugdan ang fluvial paarde ug mudiretso sa bahin sa Fish Port dayon mubalik ug mudunggo sa Queen Tuna Park.
Samtang sukad Enero 14 hangtod 15, ibawal ang mga ilimnun hilabi na sa mga kapitan sa barko ug mga panagatan aron malikayan ang trahedya atul sa kapiyestahan.
Samtang gilimitahan usab ang mga tawo nga musakay sa amphibian ug sa mga panagatan nga makigdungan sa fluvial parade, kung asa kinahanglang may life vest ang tanan nga musakay.
Ibawal usab ang pagpabuto ug fireworks, ug may ipatuman nga 30-40 metros nga distansya sa matag panagatan, ug dili sila pwedeng mu-overtake sa matag usa.
Dungan niini, naka-standby lamang ang mga sakop sa Philippine Coast Guard ug sa kapulisan aron mamintina ang kalinaw ug kahapsay ang kinatibuk-ang kasaulugan, lakip ang seguridad sa tanang makigduyog.
