GENERAL SANTOS CITY – Wala gi interasan sa usa ka katabang sa panimalay ang usa ka ATM card ug katorse mil pesos cash nga nakita niini sa dalan samtang padulong sa gialagaran nga panimalay.
Hinuon gihatag pa ang nakita nga salapi sa iyang amo nga nangita ug paagi nga makontak sa social media ang tag-iya sa kwarta.
Kagahapon miadto sa panimalay ni Bing Fantin sa Malandag Malungon Sarangani ang nagpangalan ug Yvonne Philip Nicanor nga taga Sinulon, T’boli South Cotabato ang tag-iya sa napunitan nga kwarta.
Nahimamat usab ni Nicanor ang nakapunit sa iyang kwarta nga si Nimfa Tupas Taypin nga residente usab sa Malandag. Malungon.
Nasuta nga ang nahisgutang kwarta ang premyo niini dihang midaug sa beauty pageant nga gitawag ug Drag contest.
Isip pagtahud ngadto kang Taypin gipasul-ob ni Nicanor ang iyang Korona samtang nagpakuha ug hulagway.
Ang post sa social media ang miani ug daghang shares ug likes lakip mga positibu nga komento ug pagdayeg.
