Giaprubahan na ni Pope Francis ug sa grupo sa cardinals ang kanonisasyon sa 15-anyos nga solterito sa Italya nga si Carlo Acutis apan walay gihatag nga eksakto nga petsa kun kanus-a kini mabutang sa lista sa Catholic saints.
Sumala sa Vatican, mahimong maproklama si Blessed Carlo Acutis isip Santo dungan sa 2025 Jubilee nga posible idungan sa uban usab nga canonizations.
Ang Jubilee mao ang usa ka Holy Year nga tradisyonal nga nagakahitabo sa usa ka higayon lamang sa sulod sa 25 ka tuig.
Ginalauman nga sa maong higayon, 30 million ka tumuluo ang muadto sa Roma aron nga mangayo ug pasaylo sa ilang mga sala.
Pananglitan mahitabo ang canonization kang Acutis sa 2025 Holy Year, makonsidera kini nga bag-o nga nawong sa Simbahang Katolika.
Usa siya ka computer programmer nga napatay tungod sa leukemia kaniadtong Oktubre 12, 2006 ug gibansagan na sa uban nga “the first millennial saint”.
Kasagaran siya nagasul-ob ug jeans ug trainers ug nagadula ug video games sama sa Halo, Super Mario ug Pokémon, ug uban pang aktibidad nga gina-enjoy sa karon nga henerasyon.
Ang iyang istorya ang ginatan-aw nga makatabang ug dako sa Catholic Church aron nga mas makapaduol sa mga kabatan-unan sa digital age tungod sa pagka-popular usab niini sa Catholic youth groups.
Ang approval nga gihatag ni Pope Francis ug sa College of Cardinals kagahapon Hulyo 1 ang makonsiderang “formality”, tungod kaniadtong Mayo 23, kun kahinumduman nga gikumpirma na sa Vatican ang ikaduha nga milagro nga kabahin sa ‘intercession’ sa solterito nga usa ka pre-requisite alang sa pagka-santo.
