GENERAL SANTOS CITY – Kasong kalapasan sa Presidential Decree (PD) 1602 o Anti-Illegal Gambling Act ang giatubangon sa pito ka lalaki human nga madakpan nga nagpahigayon og tari-tari sa Purok 30, New Mabuhay ning syudad.
Giila ni P/Staff Sergeant Clifford Bayandang sa San Isidro PNP ang mga dinakpan nga silang Bernard Matulak Urabia, 40 anyos og Ryan Matulak Bangkas 23 anyos nga pulos handler og manok panabong.
Lakip silang Bonifacio Sulit Itang, 51 anyos driver, Artemio Duga-duga Kuan, 39 anyos, driver, Arnel Upong Yapo, hamtong ang pangidaron usa ka laborer; Jomarie Upong Mansukay, 45 anyos, usa ka dicer og Franklin Eliver Estose, 52 anyos, usa ka driver.
Una ang pagpanakop, nakadawat og impormasyon ang kapulisan kalabotan sa tari-tari nga natigayon sa nasampit nga lugar hinungdan nga wala naglangan nag-adto sa lugar kung asa naaktohan ang pito nga nagpaaway og manok panabong.
Nakumpiska sa kapulisan sa mga nasampit ang upat ka buhing manok panabong og P1,000 nga gituohang pusta sa mga dinakpan.
