Kasamtangan nang giberipika sa Armed Forces of the Philippines (AFP) ang mga taho bahin sa usa ka Pilipino nga gikatahong namatay samtang nakig-away uban sa pwersa sa Russia sa nagpadayong gubat sa Ukraine.
Matud kang AFP spokesperson Col. Francel Margareth Padilla, dili pa opisyal nga makumpirma sa militar ang pagkatawo sa maong Filipino fighter, lakip na ang eksaktong mga sirkumstansya sa insidente.
Gipasiugda niya nga sayo pa kaayo aron makahatag ang AFP og tino nga pahayag samtang nagpadayon pa ang proseso sa imbestigasyon ug validation.
Gipagawas sa Armed Forces of the Philippines ang maong pahayag human sa taho gikan sa usa ka independent Ukrainian news agency. Sumala sa intelligence agency sa Kyiv, usa ka 37-anyos nga Pilipino nga gikan sa Metro Manila ang namatay sa Donetsk Region samtang nakig-away alang sa Russian military.
Base sa impormasyon nga nakuha sa Ukrainian Defense Intelligence, nakakuha kuno ang maong fighter og Russian visa niadtong Enero 2026 ug mibyahe paingon sa Russia niadtong Abril. Gikatahong mipirma usab siya og kontrata sa Russian Armed Forces niadtong Mayo 3.
Human sa usa ka semana nga military training, gilayon kuno siyang gipadala sa frontline diin siya namatay sa ulahing bahin sa Mayo atol sa usa ka pag-atake duol sa Katerynivka sa Donetsk Region.
Una nang nagpahimangno ang Department of Foreign Affairs (DFA) sa mga Pilipino batok sa pag-apil sa mga langyaw nga armadong panagbangi o pagserbisyo isip mga “mercenary” o bayarang sundalo sa ubang nasod.
