Dili pa panahon alang sa Pilipinas nga mobalik sa International Criminal Court o ICC, sumala sa Malacañang niining Miyerkoles.
Gipahayag ni Palace Press Officer Claire Castro nga nagpabilin ang baroganan ni Presidente Ferdinand Marcos Jr. nga dili pa panahon alang sa pagbalik sa nasod sa ICC.
Girespeto usab sa Palasyo ang panawagan ni United States President Donald Trump sa mga miyembro sa ICC nga mohawa na sa maong tribunal.
Matud ni Castro, gipahibalo na sa Pilipinas ang Estados Unidos kabahin sa posisyon sa gobyerno kalabot sa kaso ni kanhi Presidente Rodrigo Duterte sa ICC.
Giklaro usab sa opisyal nga wala siyay nakita nga epekto ang maong panawagan ni Trump sa nagpadayong proseso sa kaso ni Duterte, diin nagpadayon ang pag-apil sa mga complainant, abogado, prosecutor ug depensa.
Pormal nga mibiya ang Pilipinas sa ICC niadtong Marso 17, 2019, usa ka tuig human gimando ni Duterte ang pag-withdraw sa nasod gikan sa Rome Statute nga nagtukod sa maong tribunal.
