Bukas ang Pilipinas sa pagpaubos sa Alert Level 3 nga kasamtangang gipataas sa Israel ug Iran.
Sa interbyu sa Bombo Radyo kang Foreign Affairs Undersecretary Eduardo de Vega, gipadayag ni Undersecretary de Vega nga andam ang nasud nga ipaubos ang alert level sa duha ka giingong mga nasud sa labing dali nga panahon kon magpadayon ang gideklarar nga ceasefire.
Hinuon, matud niya gikinahanglan ang opisyal o pormal nga rekomendasyon gikan sa Philippine Ambassador nga nadestino sa duha ka nasud aron hingpit nga makonsiderar ang pagpaubos sa alert.
Ubos sa ikatulong alerto, ipatuman sa gobyerno sa Pilipinas ang boluntaryong pagpauli sa mga Pilipino sa mga nasud diin gipataas ang alerto.
Sa pagkakaron, gipasalig ni De Vega nga magpadayon gihapon ang Alert Level 3 protocol nga gisunod sa Pilipinas sa duha ka nahisgutang mga nasud.
Apil na niini ang pagpauli sa mga gustong mopauli, ug ang pag-andam sa igong hinabang alang sa matag mobalik nga Pilipino.
Una nang niingon si Philippine Ambassador to Israel Aileen Mendiola nga gikan sa 340 ka mga Filipino nga unang nihangyo nga mobalik sa Pilipinas atol sa kataas sa gitawag nga 12-day war, hingpit nga mius-os ang gidaghanon nunot sa hingpit nga pagkanselar sa mga Filipino sa ilang hangyo, tungod sa giaprobahan nga ceasefire.
