COTABATO- Subay sa walay hunong nga kampanya niini batok sa iligal nga patigayon sa mga pekeng produkto, ang Police Regional Office 12, ubos sa pagpangulo ni PBGEN ARNOLD P ARDIENTE, Regional Director, nakasakmit og Php 7,936,580.00 nga kantidad sa mga smuggled nga sigarilyo sa National Highway sa Sitio Malabuaya, Barangay Kayaga, Kabacan, Cotabato Police Persona niadtong Marso 2.
Nakadawat og impormasyon ang Unit (RPDEU) 12 nga usa ka ten-wheeler wing van truck ang giingong naghatod og mga smuggled nga sigarilyo gikan sa Maguindanao del Norte ug miagi sa Cotabato Province.
Samtang nagpahigayon og surveillance sa gikatahapan nga sakyanan, nabantayan sa mga personahe sa Kabacan Municipal Police Station, Cotabato Police Provincial Office (CPPO), Regional Intelligence Division (RID) 12, ug RPDEU 12 nga mihunong kini sa nahisgutang lugar dihang miduol ang Nissan Navara pickup hinungdan nga mihimo dayon sila og aksyon.
Sa dihang nakamatikod sa presensya sa mga operatiba, ang drayber sa trak dayon misakay sa pickup ug miikyas, gibiyaan ang trak sa dapit. Sa pagsusi, nadiskobrehan sa mga awtoridad nga ang giabandonar nga trak punog karga sa 202 ka kahon o 10,100 ka ream sa nagkadaiyang smuggled nga sigarilyo.
Sa pakig-alayon sa Bureau of Customs (BOC) sa General Santos City, ang mga awtoridad nihimo og imbentaryo ug pagmarka sa mga nasakmit nga kontrabando sa operation site atubangan sa opisyal sa barangay ug representante sa media.
Ang mga nakumpiska nga mga ebidensiya gidala sa Kabacan MPS, CPPO, alang sa tukmang dokumentasyon ug itugyan ngadto sa BOC General Santos City alang sa tukmang disposasyon.
