Himuon sa Siargao Islands partikular sa lungsod sa Dapa, Surigao del Norte karong Agusto 19 hangtud 23 ang Philippine-United States Visiting Forces Agreement and Tempest Wind 2024.
Tumong niini ang pagpalig-on sa koneksyon ug pagtinabangay sa armadong kusog tali sa duha ka mga nasud, ilabina sa pagtubag sa mga hulga sa seguridad, terorismo ug natural nga mga katalagman.
Kagahapon, gihimo sa Police Provincial Office sa Surigao del Norte ang forum sa may Dapa Sports Complex tali sa mga kadagkuang opisyal sa kapulisan, mga representante gikan sa kagamhanang probinsiyal, local government units sa Dapa ug General Luna, mga sakop sa Bureau of Fire Protection, Philippine Coast Guard, Philippine Army, ug mga non-government organizations sa maong dakbayan.
Ang nasangpit nga ehersisyo langkuban sa mga simulation ug field training nga nakatutok sa pagtubag sa krisis, koordinasyon, ug mga taktikal nga operasyon, nga makatabang sa probinsya pinaagi sa mga ideya nga ipa-ambit atol sa maong pagbansay.
