Nisang-at og petisyon sa Commission on Elections ang koalisyon nga Alyansa ng Nagkakaisang Mamamayan (ANIM) nga naghangyo nga i-disqualify ang pipila ka prominenteng political aspirants sa 2025 midterm elections.
Lakip sa gipa-disqualify sila si kanhi Presidente Rodrigo Duterte, House Speaker Martin Romualdez, Senador Cynthia Villar, Ilocos Norte Gov. Matthew Marcos Manotoc, ug Catanduanes Vice Governor Peter Cua.
Samtang ang mga petitioner mao sila si Bishop Gerardo Alminanza ug uban pa.
Sa pipila ka mga petisyon, gitumbok sa grupo ang ilang basehan sa pagpasaka sa disqualification complaint nga may kalabotan sa tulo ka anti-dynasty provision nga nalatid sa batakang balaud.
Matod ni Atty. Alex Lacson, con-convenor sa koalisyon aduna silay lig-ong basehanan sa maong petisyon.
Gikuwestiyon usab niini ang kamatuoran nga ang mga magkapamilya sa politika mag-ilis lamang sa mga posisyon kung mahuman na ang pipila ka mga termino.
Nanghinaot usab si ANIM lead convenor Bobby Yap nga sa higayon nga paboran ang pipila ka argumento, makahatag kini og dakong epekto ug kausaban sa kahimtang sa politika sa nasud.
Kahinumdoman nga nagduso si kanhi Pangulong Duterte og COC aron mokandidato pagka-mayor sa Davao City.
Samtang modagan pagka-kongresista sa Unang Distrito sa Leyte si House Speaker Romualdez.
Ang anak usab ni Sen. Imee Marcos nga si Ilocos Norte Gov. Manotoc modagan pagka-Bise Gobernador sa probinsiya.
Samtang, si Catanduanes Bise Gobernador Peter Cua nakahukom nga modagan pagka-Mayor sa Virac, Catanduanes alang sa 2025 midterm elections.
