Nagpadala ang Philippine Coast Guard o PCG og mga personnel ug barko aron moapil sa 24th Regional Marine Pollution Exercise o MARPOLEX sa Bitung–Manado, North Sulawesi, Indonesia.
Mibiya ang contingent sa PCG gikan sa Pier 13, South Harbor, Manila niadtong Oktubre 2 isip pagpangandam sa maritime exercise nga ipahigayon gikan Oktubre 8 hangtod Oktubre 12.
Lakip sa mga barko nga moapil ang BRP Gabriela Silang ug BRP Tubbataha, kauban ang mga personnel gikan sa Marine Environmental Protection Command, Special Operations Force, Medical Service ug Nursing Service.
Tumong sa Regional MARPOLEX nga mapalig-on ang koordinasyon ug kaandam sa mga nasod nga moapil sa pagtubag sa ‘oil pollution’, ‘hazardous’ ug ‘noxious substances’, ‘rescue operations’ ug uban pang ‘marine emergencies’.
Pangulohan ang kalihokan sa Directorate General of Sea Transportation sa Indonesia, uban sa Japan Coast Guard.
Sumala sa PCG, makatabang ang maong ehersisyo sa pagpalig-on sa regional cooperation ug sa kapasidad sa pagtubag sa mga insidente nga mahimong makaapekto sa kadagatan.
