Upat pa ka indibidwal nga nalista sa passenger manifest sa MV June Aster ang gikumpirmang wala makasakay sa barko sa dihang mibiya kini sa Baseco Port sa Manila niadtong Septiyembre 8, sumala sa Philippine Coast Guard o PCG.
Sumala kang PCG spokesperson Commodore Noemi Cayabyab, nadiskubre sa Emergency Operation Center sa Coron niadtong Septiyembre 15 nga wala kasakay sa barko ang upat sa dihang nasunog kini samtang nagpadulong sa Coron, Palawan niadtong Septiyembre 9.
Tulo kanila ang giingong nagplano nga mag-book og biyahe gikan Coron paingon sa Manila apan nasayop ug Manila-to-Coron ang ilang na-book.
Samtang, ang ikaupat nakapag-book na og laing tiket ug nakabiyahe na paingon sa Coron sakay sa laing passenger vessel niadtong Septiyembre 5.
Tungod niini, giingon sa PCG nga 128 ka pasahero ug 17 ka crew members ang aktuwal nga sakay sa MV June Aster sa dihang mibiya kini sa Manila.
Nagpabiling 77 ang ihap sa mga namatay, samtang 43 ka survivors ang accounted ug walo ang opisyal nga gikonsiderar nga missing.
Padayon ang PCG sa pag-kumpirma ug pagsusi sa impormasyon sa mga pasahero nga anaa sa manifest.
