GENERAL SANTOS CITY – Gituohang gilabay lang ang patay nga lawas sa usa ka lalaki nga nakit-an sa Tampat, Maasim, Sarangani, alas-11 sa gabii kaniadtong Sabado.
Kini tungod walay nakaila sa biktima sa mga residente sa lugar.
Padayong giila sa mga imbestigador sa Maasim Municipal Police Station ang maong biktima nga adunay samad pinusilan sa iyang lawas dihang nakaplagan lamang sa sagbutan nga bahin sa lugar.
Sa gihimong pagsusi sa kapulisan, may nakamarka sa kamot niini nga sama nga nakaposas..
Semi-sundalo ang tope sa buhok sa biktima nga anaa sa gitas-on nga 5’8″ og gibanabanaang nagpangidaron ug 20 ngadto sa 24 anyos.
Nakasul-ob usab kini ug kulay blue nga may marka nga letrang R nga kulay yellow samtang nakasapatos ug blue og nakapantalon ug maong, gawas pa ang bangas sa iyang suwang nga bahin.
Nanawagan ang maong presinto sa nawad-an ug kabanay nga makig-alayon sa ilang presinto aron ilhon ang naasoyng lalaki.
