GENERAL SANTOS CITY – Kapin usa ka milyon ka pesos ang natala nga danyos sa pagkasunog sa usa ka passenger van sa Lumasal, Maasim, Sarangani Province kagabii, Nobyembre 7.
Kini ang migawas sa pagsuta sa Bureau of Fire Protection-Maasim, kung asa padayon matud pa ang ginapahigayong imbestigasyon aron masayran ang motibo ug tinuod nga ilhanan sa mga responsable sa insidente.
Sa report sa Maasim Municipal Police Station, gikan sa Gensan ug paingon sa Maitum ug may tulo ka pasahero ang naasoy’ng van nga may plaka nga VFP-475 nga gipanag-iyahan ug gimanehuan sa usa ka Rey Napilas.
Pag-abot sa Lumasal, mipara matud pa ang usa ka pasahero.
Apan pagnaog matud pa sa naasoy’ng pasahero, kalit nanggawas ang mga armadong kalalakihan nga nagpailang mga miyembro sa New Peoples Army (NPA).
Gipapanaog ang driver ug mga pasahero una gibubuan ug gasolina ang van ug gisunog.
Apan nalisdan matud pa karon ang BFP sa ilang imbestigasyon human nga gilayong gikuha sa tag-iya ang van, ug wala pa mireport ug balik kanila.
Kahinumduman nga miaging mga semana, may gisunog usab nga wing van sa KCC Mall sa Malapatan, Sarangani.
Apan matud kang Police Chief Inspector Niel Wadingan, tigpamaba sa Sarangani Police Provincial Office, dili pa masulti kung adunay koneksyon ang duha ka managlaing pagpanunog.
