GENERAL SANTOS CITY – Gihingusgan ni Father Raul Valle nga dili angayang i-tolerate kon pasagdan na lang si Pangulong Rodrigo Duterte sa mga dili maayong ginapagawas nga pahayag o komento.
Kini human ang pagtawag sa presidente nga ‘stupid’ sa Diyos. Gibutyag sa Bombo ni Fr. Valle, bisag anad na matud pa ang mga tawo sa pagmalikas og istilo sa pagpamahayag ni pangulong Duterte apan dili maayo ang iyang gihimo nga pagpamalikas og paghimaraot sa Diyos.
Sa pamahayag niini, tanan kita binuhat sa Ginoo og walay padulngan kon dili ang mamatay ug mahimong abo. Wala usab katungod ang si kinsa man nga mukuwestiyon sa Ginoo.
Alang kang Fr. Valle, lisod matud pa magkomento sa usa ka tawo nga lahi ang pagtuo sa Ginoo og lahi nga Ginoo nga iyang gituohan.
Gibutyag ni Fr. Valle nga dili angay sa usa ka tawo nga gahupot og pinakataas nga posisyon sa nasud ang musulti ug ‘stupid’ sa Diyos.
Giawhag niini ang publiko nga i-ampo gihapon ang Pangulo aron maka-amgo sa iyang mga gipanulti.
Samtang, nagtuo si Fr. Valle nga wala kaayo makaapekto sa mga tawo ilabi sa pagsalig sa Ginoo humna ang pagtawag ni Pangulong Duterte ug stupid sa Ginoo.
Matud sa nasampit, didto sa Santo Niño South Cotabato og Sultan Kudarat kung asa siya karon gaalad sa simbahan wala gitagad og wala kaayoy reaksyon ang mga katawhan sa pahayag sa pangulo.
Padayong gasimba og gadangop sa simbagan ang mga nasampit.
Nagtuo usab si Fr. Valle nga wala kaayo makaapekto sa kinabuhi sa mga residente sa lugar ang gisulti sa pangulo.
Luyo sa mga hugot nga pagsaway, gibarugan gihapon ni Pangulong Duterte ang nahimo niining pahayag.
