Gikatahong igo ang suplay sa tubig-imnon sa nasod, bisan pa man sa pagsugod sa “super El Niño.”
Gihatag sa Malacañang kini nga pasalig taliwala sa mga taho bahin sa mga tawo nga giingong nag-imbak og bottled water ug mga balde isip pagpangandam sa super El Niño, nga gilaumang adunay grabeng epekto sa nasod.
Matod ni Palace Press Officer Atty. Claire Castro, wala makadawat ang Palasyo og impormasyon nga nagpakita og kakulang sa tubig-imnon atol sa panahon sa El Niño; busa, walay rason aron mag-panic buying o magdali-dali sa pagpamalit tungod sa kahadlok.
Gipunting ni Castro nga nasinati sa nasod ang El Niño matag tuig ug aduna nay giumol nga Task Force El Niño, busa walay angay kabalak-an bahin sa adlaw-adlaw nga pag-access sa tubig-imnon.
Dugang pa ni Castro, ang pag-imbak og tubig makabalda sa suplay ug mahimong hinungdan sa pagsaka sa presyo sa bottled water.
