GENERAL SANTOS CITY – May ginatan-aw nang anggulo ang mga imbestigador sa Pendatun Police Station may kalabutan sa pagpusil-patay sa usa ka laborer miaging semana atubangan sa Diagan Hospital sa Quezon Avenue, Brgy Dadiangas North ning siyudad.
Sa pakighinabi sa Bombo Radyo kang Police Chief Insp. Nestor Maderse, hepe sa nasampit nga presinto, migawas nga posible matud pang “mistaken identity” ang nahitabo, human nga ang iyang uyuan nga usa sa kauban niya kaniadtong gipusil siya, ang nakadawat matud pa ug bahad sa kinabuhi.
Gaistoryahanay matud pa sila kaniadtong tungura sa iyang uyuan samtang naka-helmet, dihang miabot ang naka-motorsiklo nga mga suspek ug gipusil ang biktima.
Samtang usa pa sa ginatan-aw sa kapulisan ang gikataho nga may kalabutan sa bangi sa yuta nila sa Malapatan luyo nga padayon pa nilang ginaberipika ang maong taho.
Apan wala usab nila gitangtang ang lain pang anggulo may kalabutan sa kanhing kaso sa biktima nga murder kaniadtong 2006, nga na-dismiss kaniadtong 2013.
Sa karon gilaumang muabot na ang resulta sa gipahigayong pagsuta sa mga slugs nga narekober sa crime scene, aron makumpara sa ubang mga pagpamusil nga natigayon sa siyudad.
