GENERAL SANTOS CITY – Aron mapaklaro ang pagdako sa intelligience fund ni Gensan Mayor Lorelie Pacquiao nga P82M mupalit ang LGU Gensan ug 28 ka 4×4 pick-up truck nga nagkantidad ug tig dos milyones pesos matag usa ug tulo ka big bike nga nagkantidad ug tig P1.9 milyon matag usa.
Matud ni City Councilor Jose Edmar Yumang nga kung wad-on kini nga expenses dili makaabut sa P82M ang intelligience fund ni Mayor Pacquiao sa 2024 budget.
Isip kanhi finance committee chairman sa Konseho miagi sa iyang komite ang naasoy nga dokomento apan iya kini nga gipagamyan imbes 28 ka 4×4 pick-up truck gihimo niini nga 20 samtang ang tulo ka big bike gihimo niini nga 40 ka 125 cc motorcycle.
Sa gihimo matud pa niini nakadaginot pa ang syudad ug halos dose milyon ka pesos. Ang plano nga pagpalit ug mga sakyanan nakalatid sa Peace and order public safety budget nga giaprubahan ni Mayor Lorelie Pacquiao aron maapil sa 2024 budget.
Isip kanhi chairman sa finance committee sa Sanggunian Panlungsod iya kini nga gikwestyon tungod niadtong Nobyembre 2023 lang naghatag ang syudad ug onse ka 4×4 pick-up alang sa kapulisan sa syudad.
Apan tungod nabag-o na ang plastada sa konseho ug naalisdan siya isip chairman sa finance committee naglaum na lamang nga masunod ang orihinal nga plano sa syudad nga mupalit ug 28 ka pick-up truck ug tulo ka big bike.
Nasuta nga sa 2023 budget ang intelligience fund sa Mayor anaa lamang sa P60M.
