GENERAL SANTOS CITY – Gikatakdang i-relocate sa lokal nga panggamahanan ang tanang mga residente sa Prk Tinago Brgy Dadiangas South ning siyudad.
Sa pakighinabi sa Bombo Radyo kang Mary Ann Bacar, labaw sa City Land and Housing Office, gibutyag niini nga ang relocation site nahimutang sa Brgy Apopong, kung asa hatagan ug balay ug lote nga nagkantidad ug P150,000 matag usa, apan gumikan gisubsidy sa gobyerno, hinundgan nga mamahimo na lamang tig-P100,000 matag usa, kung asa P700 ang binulan nilang bayaran.
Gibanabanaang mukabat sa kapin 150 ka mga house and lot ang ipanghatag sa mga benepisyaryo.
Gumikan niini, gikatakdang tigumon ni Bacar ang tanang mga residente sa lugar, aron sutaon kadtong mga tinud-anay gayud nga benepisyaryo ug actual occupants.
Kini human nasayran nga adunay uban nga gipaarkilahan ang ilang mga balay sa Tinago, ug may kaugalingon nang balay.
Human makuha ang mga balay sa Tinago, dili na matud pa kini papuy-an pa, alang sa mas maayong plano sa gobyerno sa nasampit nga area.
