GENERAL SANTOS CITY – Gipadayag ni Gensan City Mayor Lorelie Geronimo Pacquiao ang iyang pasalamat sa mga magtutudlo sa Dakbayan sa ilang kinasingkasing nga serbisyo ug kontribusyon sa paglambo ug sa siyudad atol sa Culmination Program sa World Teachers’ Day nga gipasiugdahan sa Department of Education (DepEd) Division of General Santos isip kabahin sa month long celebration sa World Teachers’ Day nga gipahigayon sa General Santos City Gym nga adunay tema, “Gurong Pilipino, Dangal ng Sambayanang Pilipino”.
Matod pa sa Mayor nga kampante kini sa mga outcome kung ang mga magtutudlo ang mahimong partner sa mga proyekto.
Kahibalon nga naghatag ug spot cash nga P50 mil ang Mayora aron ipaambit sa mga magtutudlo.
Nasayran nga ang mga magtutudlo sa DepEd sa Dakbayan maoy usa sa mga kaabag ni Mayor Pacquiao sa iyang pagkahamtong, edukasyon, ug uban pang importanteng proyekto sa Lungsod sa General Santos.
Samtang si Bise Mayor Rosalita T. Nunez, nga girepresentahan ni City Councilor Ma. Lourdes Casabuena, ang nagpadangat usab ug mensahe sa pagtimbaya ngadto sa mga magtutudlo uban ang mainitong pahalipay alang sa maayong trabaho.
