GENERAL SANTOS CITY – Kapin sa P600,000 nga kantidad sa smuggled nga sigarilyo gikan sa Indonesia ang naharang sa General Santos City Police.
Kahibaluan nga gipresenta nilang Police Chief Supt. Marcelo Morales, regional director sa Police Regional Office 12 ug Police Senior Supt. Raul Supiter, City PNP director, ang 33 ka kahon sa smuggled nga Garam cigarettes gikan sa Indonesia.
Sikop ang tulo ka tawo nga silang Ellio Adelbert Alamia, Nader Malik Tanjing, ug ang Indonesian national nga si Roger Segismel Malik Tanjingna, nga sakay sa usa ka yellow nga bangka nga karga ang naasoy’ng mga pinayuhot nga sigarilyo.
Matud kang Police Senior Inspector Davis Dulawan, hepe sa Tambler Police Station, gapuyo usab dinhi sa siyudad ang mga suspek.
Una matud pang namatikdan ang naasoy’ng bangka sa may Kulasi, Brgy Labangal.
Ug kagahapon sa kaadlawon, girespondehan kini sa mga otoridad sa Puting Bato, Brgy Calumpang ning siyudad, nga nagresulta sa pagkasikop sa tulo.
Gipailawom na sa imbestigasyon ang mga suspek, samtang giandam ang ipasang-at nga kaso batok kanila.
Samtang ang mga nakumpiska nga smuggled nga sigarilyo ang gikatakdang i-turnover sa Bureau of Customs.
