GENERAL SANTOS CITY – Dako ang kapuslanan sa mga residente sa Sarangani Province sa proyektong P3 nga gipaila-ila sa Department of Trade and Industry(DTI) atul sa pagbisita sa probinsya ni UnderSecretary Zenaida Maglaya.
Ang programa nga iya sa kasamtangang administrasyon alang sa mga gagmay nga negosyante nga gitawag ug Pondo sa Pagbabago at Pag-asenso.
Ang P3 ang usa ka alternatibong pautang gikan sa DTI kauban ang small business corporation diin pweding makahulam sa mubo nga interest ang mga micro- enterprises o gagmay nga negosyante sama sa market vendor ug mga kooperatiba kumpara sa pagpangutang sa 5-6 nga dagko ang interest.
Nasayran nga aduna lamang 2.5 percent nga interest matag bulan nga mamahimo nga makautang ug 5,000 ngadto na sa P100,000.
Gumikan niini gi-ablihan sa DTI ang ilang buhatan alang niadtong mga buot muhulam ug pundo.
Una nang gibutyag ni Sarangani Governor Steve Solon nga ang naasoy nga programa ang hinay hinay nga gaabut sa probinsya gikan sa kasamtangang administrasyon.
