GENERAL SANTOS CITY – Karong adlawa na matapos ang online registration nga gipatuman sa Business Permits and Licensing division human giablihan sa syudad ang renewal sugod niadtong Enero 2 niining tuiga alang sa mga negosyante dinhi sa dakbayan.
Matud ni Christian Mark Abarquez ang tigdumala sa maong buhatan nga buot pa nila nga mahatagan ug extention ang online renewal human mihangyo sa Sanggunian Panlungsod apan sukad kagahapong adlawa wala silay nadawat nga kopya sa resolosyon aron mahimong pormal ang pagsibug sa Enero baynte nga deedline.
Matud ni Abarquez nga sugod alas otso sa buntag hangtud alas dose sa tungang gabii abli na ang ilang buhatan.
Nagtuo kini nga muabot karong adlawa ang mukapin sa 2,000 ka mga negosyante nga wala pa makaproseso sa ilang renewal human naka isyu ang syudad ug 7,000 ka mga permit .
Naglaum usab nga makabayad pinaagi sa online ang mukapin 4,000 ka negosyante nga for payment na samtang 2,000 pa ang kulang aron makuha ang giingong target.
Samtang ila na usab gipangandaman nga magkaguot ang mga buot makaapas sa renewal, lakip sa gipangandaman ang posible nga aberya sa internet hinungdan nga gideploy ang information communication technology division aron maresolba ang posible nga problema.
Sa mga dili makaapas sa deadline mamahimo gihapon sila makarenew sa ilang business permit apan sugod adlaw nga Lunes may bayaran na nga 25 percent nga surcharge sa total amount due ug may interest nga 2 porsyento matag bulan.
