Nagpadayon ang pahimangno sa Office of Civil Defense (OCD) ngadto sa publiko nga magmatngon, mag-andam, ug kanunay mosubay sa kahimtang sa panahon ug mga pahibalo sa mga otoridad tungod sa epekto sa Habagat o Southwest Monsoon ug Low Pressure Area (LPA).
Sumala sa OCD, adunay mga lugar nga gipaabot nga makasinati og kasarangan hangtod kusog nga pag-ulan sulod sa mosunod nga mga adlaw.
Gikan karong Hulyo 22 hangtod udto sa Hulyo 23, anaa sa Yellow Warning ang mga probinsya sa Lanao del Sur, Maguindanao del Norte, Sultan Kudarat, ug Sarangani, diin gipaabot ang 50 hangtod 100 milimetro nga ulan.
Samtang gikan udto sa Hulyo 23 hangtod udto sa Hulyo 24, posible usab ang maong kadaghan sa ulan sa Antique, Negros Occidental, Negros Oriental, Zamboanga Sibugay, Zamboanga del Sur, Lanao del Norte, Lanao del Sur, Maguindanao del Norte, Sultan Kudarat, ug Sarangani.
Giawhag sa OCD ang mga residente, ilabina ang nagpuyo sa mga lugar nga delikado sa baha ug landslide, nga mag-andam ug magpabiling alerto sa posibleng peligro tungod sa padayon nga ting-ulan.
