GENERAL SANTOS CITY- Nagpahimangno ang DENR sa publiko ilabina kadtong nagpuyo sa baybayon nga mag-igmat og mahimong alerto tungod kini nga nagpabiling wala madakpan ang buaya, partikular ‘saltwater crocodile’.
Kahibaluan ni Dr. Roy Mejorada Science Research Specialist sa DENR 12, dili binuhi ug walay tag-iya ang buaya nga nakita sa mga residente sa Minanga, Buayan ug Lun Padidu Malapatan Sarangani.
Gipaklaro niini, ang binuhi nga buaya ang dili mahadlok ug tawo apan ang buaya nga nakita sa dagat nga bahin sa Lun Padidu ang nahadlok sa drone nga nagpasabot matud pa nga idlas.
Sa pipila ka gabii ug adlaw nga pagpaniid sa grupo sa mga crocodile expert sa baybayon sa Minanga Buayan paingon sa Malapatan Sarangani negatibo ang nahimong resulta human nga wala igkita ang buaya.
Sa pamahayag ni Mejorada nga dili mupakita ang buaya kung lamdag ang bulan, baluron ang dagat ug kusog ang huros sa hangin. Gipahinumduman sa DENR ang publiko nga dili pasakitan o ipasipala ang buaya.
