GENSAN – Gipasabot ni Police Brigadier General Arnold Ardiente, Regional Director sa Police Regional Office 12, nga dili pwedeng mahimong supakon sa lokal nga ordinansa ang nasudnong balaod nga nagmando sa pagsul-ob og helmet sa tanang motorcycle riders ug back riders, bisan pa sa reklamo sa publiko sa General Santos City nga ipatuman ang “no helmet policy” tungod sa sunod-sunod nga shooting incident.
Matud ni Ardiente, usa kini sa mga hagit sa lokal nga pangagamhanan kay klaro ang nasudnong balaod ug dili kini pwede nga balewalaon sa local legislation.
Iyang gipasiugda nga dili ang pagsul-ob og helmet ang tinuod nga hinungdan sa mga pamusil, kondili ang kakulangan sa mas proaktibong palisiya aron malikayan ang krimen sa wala pa kini mahitabo.
Gidugang niya nga ang wala pagsul-ob og helmet mahimo rang makatabang sa imbestigasyon human sa insidente, apan dili kini solusyon sa paglikay sa krimen.
Busa, mas angay matod niya nga tutukan sa kapulisan ang preventive measures, intelligence gathering, ug presensya sa kadalanan aron mapugngan ang mga insidente sa pamusil sa dakbayan.
