Misaad si National Food Authority (NFA) Administrator Larry Lacson nga pauswagon pa sa nasangpit nga ahensya ang serbisyo niini aron makuha ang pagsalig sa mga Pilipino.
Sa mensahe sa Pasko ni Lacson, iyang gipadayag ang iyang tinguha nga mabalik ang pagsalig sa katawhan tungod kay matod niya nga mas daghang mag-uuma ang motabang sa NFA mas mosalig ang publiko sa ahensya.
Matod ni Lacson, gusto sa NFA nga makadeliver og mas barato nga bugas sa mga Pilipino.
Ang NFA Chief nitataw sa iyang tinguha nga ibalik ang ubang gahom ug gimbuhaton sa ahensya nga unang natangtang sa dihang gipatuman ang Rice Tarrification Law sa miaging administrasyon.
Nag-una dinhi mao ang pagbalik sa NFA rice ngadto sa retail service.
Matod ni Lacson, mas makahuluganon ang NFA kung mabalik ang kanhing gahom niini, ug mas makaserbisyo sa katawhang Pilipino.
Gipahalipayan usab sa opisyal ang mga kawani sa NFA sa ilang padayon nga pagserbisyo sa publiko bisan pa man sa mga hagit nga ilang giatubang karong tuiga.
