Magpahigayon pag-usab og subasta ang National Food Authority (NFA) alang sa kapin 740,000 ka sako sa daang rice stocks human napakyas nga makadani og mga mamalitay sa unang subasta niadtong Hunyo.
Base sa pahibalo sa NFA, mokabat sa 741,570 ka sako sa local milled rice nga sobra na og unom ka bulan ang ipasubasta sa Agosto 12, nga adunay kinatibuk-ang bili nga kapin P1.068 bilyon.
Matud ni NFA Administrator Larry Lacson, usa kini ka re-auction human walay malampusong bidder sa unang subasta niadtong Hunyo 30. Gipahibalo sa ahensya nga ang pre-auction conference ipahigayon sa Agosto 5, samtang ang pagbukas sa mga bid o tender mao sa Agosto 12.
Ang mga interesado nga bidder gitugotan nga mosusi sa mga rice stocks sa nagkalain-laing bodega sa NFA sa tibuok nasud gikan Agosto 5 hangtod Agosto 10.
Kinahanglan usab nga magbutang ang mga bidder og auction bond nga katumbas sa labing menos 10 porsyento sa ilang total nga bid kada lote.
Abli ang maong subasta alang sa mga organisasyon sa mag-uuma, kooperatiba, grupo, ug mga lehitimong negosyante nga interesado mopalit sa maong mga stock sa bugas.
