Ipailalom sa full alert status ang tibuok National Capital Region (NCR) sugod Lunes, dungan sa pagsugod sa impeachment trial ni Sara Duterte.
Gikumpirma ni NCRPO chief PMGen. Anthony Aberin nga gikan sa kasamtangang heightened alert, ipataas pa ang lebel sa kaandam sa pulisya human sa tulo ka adlaw nga kilos-protesta sa Iglesia ni Cristo (INC).
Matud pa niya, sa kinatibuk-an malinawon ang mga panagtapok bisan adunay pipila ka tensyon sa unang adlaw sa rally sa EDSA People Power Monument.
Wala usab natala nga seryosong insidente o disgrasya human gibalhin ang protesta sa Liwasang Bonifacio sa Manila. Sa laing bahin, andam na usab ang Philippine National Police (PNP) alang sa seguridad sa impeachment trial.
Diin adunay 6,000 ka pulis ang i-deploy palibot sa Senado aron masiguro ang kahapsay ug kaluwasan sa lugar.
Matud pa sa PNP Public Information Office, giingnan ni PNP Chief Jose Melencio Nartatez Jr. ang tanang pulis nga magpabiling disiplinado, walay pabor, ug magpokus sa pagserbisyo sa publiko.
Gipasiugda usab sa PNP nga ang pagpataas sa alert status kabahin sa padayon nilang pagtimbang sa sitwasyon aron masiguro nga andam ang pwersa sa seguridad samtang girespeto ang katungod sa mga mamamayan.
