Magpahigayon og Nationwide Simultaneous Earthquake Drill karong Huwebes, Hunyo 18, sumala sa Office of the Civil Defense. Kauban sa OCD sa maong drill ang mga miyembrong ahensya sa National Disaster Risk Reduction and Management Council.
Moapil usab ang mga opisyal sa ceremonial pressing of the button sa Camp Aguinaldo sa Quezon City isip timaan sa pagsugod sa nasudnong earthquake drill. Sunod niini ang opisyal nga paglunsad sa Harmonized National Contingency Plan alang sa Highly-Intensity Earthquake sa Greater Metro Manila Area.
Sa maong contingency plan, gilatid ang plano sa koordinasyon alang sa national government, regional disaster risk reduction and management councils, ug mga lokal nga panggamhanan panahon sa kusog nga mga linog lakip na ang gitawag nga “Big One.” Ubos usab niini, ang mga ahensya sa kasikbit nga mga rehiyon lakip ang Region 3 ug 4 ideploy sa Metro Manila aron mohatag dayon og search, rescue, ug operations support.
Magpahigayon usab og tabletop exercise diin himuon ang simulation sa pag-igo sa magnitude 7.2 nga linog nga resulta sa paglihok sa West Valley Fault, aron masulayan ang kaandam ug koordinasyon sa national ug regional response systems panahon sa kusog nga mga linog nga mahimong makaapekto sa Metro Manila ug mga kasikbit nga rehiyon.
