Nadugangan pa ang mga pangalan sa Estados Unidos sa Amerika nga interesado usab sa pagpalit sa short video application nga TikTok aron nga maluwas kini sa hingpit nga shutdown sa maong nasod.
Kun suporta ni US President Donald Trump ang hisgotan, duha ka mga tech giants ang nakakuha og pabor gikan kaniya.
Ang una mao si Elon Musk nga mao ang chief executive officer sa Tesla og SpaceX og tag-iya usab sa social media app nga X ukon ginatawag kanhi nga Twitter.
Usa si Musk sa nagapanguna nga financial backers ni Trump sa kampanya og nakaposisyon nga makahatag og daku nga impluwensya sa administrasyon sa Republican leader.
Ang usa pa ka bilyonaryo nga ginapaboran ni Trump mao ang iyang long-time supporter nga si Larry Ellison nga mao ang co-founder sa Oracle nga usa ka software company nga mao ginapuy-an sa kadaghanan sa US servers sa TikTok.
Nagpadayag usab sa iyang interes si Jimmy Donaldson ukon mas naila nga si MrBeast, usa ka YouTube star nga mao ang highest-earning creator sa internet.
Nag-uban ang 26-anyos nga internet star sa usa pa ka tech entrepreneur nga si Jesse Tinsley aron makapahigayon og all-cash offer aron maangkon ang American unit sa TikTok.
Sa nakalabay nga weekend, kahinumdoman nga dili na magamit ang TikTok sa US.
Nagbalik ang serbisyo niini sa sobra sa 170-million Americans dungan sa promisa ni Trump nga salbaron niya ang aplikasyon sa kondisyon nga ihatag ang 50% ownership sa US investors.
