GENERAL SANTOS CITY – Pormal nang gihulipan sa asawa sa gipusil-patay nga barangay kapitan sa Palimbang, Sultan Kudarat, atul sa bisperas sa Barangay and SK elections kaniadtong Lunes.
Kini human naka-file ug substitution sa Comelec ang asawa ni Kapitan Mustre Aguib, sa Barangay Mina, Palimbang, human kini midaog sa natigayong piniliay.
Samtang sukwahi ang natigayon sa Brgy Tambilil, Kiamba, Sarangani, human nga wala nagsumite ug substitution ang misis ni Kapitan Reynardo Amador, nga kahinumduman nga gipusil-patay sa mga naka-motorsiklo nga suspek, apan nakadaog gihapon sa piniliay.
Kahibaluan nga kapin libo ang nakuha nga boto sa nahisgutang kapitan bisan ug patay na.
Matud ni Helen Paidumama, municipal Comelec officer sa Kiamba, May 13 pa lang gipaabot na nila nga magfile ug substitution ang asawa ni Amador.
Apan gumikan pakyas kining mahimo, gideklara na lamang nga bag-ong kapitan ang kaatbang niini nga si Mingkat Basit.
