Migawas nga souvenirs ang matod pa mga uniporme sa militar sa China nga nadiskubre sa gi-raid nga Philippine Offshore Gaming Operator (Pogo) hub sa Porac, Pampanga nga ginagamit sa mga langyaw nga trabahante sumala kang Maj. Gen. Leo Francsico, ang hepe sa Criminal Investigation and Detection Group (CIDG).
Base sa nauna nga report, nakita ang mga uniporme sa mga dorm, villa ug mga opisina sa establishimento.
Adunay upat ka set sa uniporme sa militar ang nakita ug sa karon, morag kini mga souvenir nga ginagamit sa mga Chinese national sa POGO hub, apan wala gipadaplin ang posibilidad nga adunay usa pa nga rason nganong ang mga uniporme sa militar anaa sa lugar.
Una niini gibulgar sa tigpamaba sa Presidential Anti-Organized Crime Commission (PAOCC) nga si Winston Casio, nga adunay nakita nga dokumento nga adunay pangalan ni kanhi Presidential spokesperson Harry Roque sa establisyimento, lakip ang mga uniporme sa People’s Liberation Army, usa ka “outstanding service medal” alang sa usa ka sarhento sa Chinese military, military pin, ug duha ka pares sa botas.
Kahinumduman nga kapin-kulang duha ka semana na ang nakalabay dihang nagpahigayon ug raid ang PAOCC ug joint operatives sa Philippine National Police units, nga nagresulta sa pagkaaresto sa kapin 190 indibidwal sa sulod sa Pogo complex sa may Friendship Highway sa Angeles City, Pampanga.
