GENERAL SANTOS CITY – Naapil sa gustong masayran sa bag-ong labaw sa kapulisan sa syudad ang pagpusil patay sa magtiayong Becera sa Morrow Blvd., Mabuhay ning syudad nga natigayon miaging mga bulan.
Kini human gibutyag ni OIC City PNP Director Gilber Tuzon nga may person of interest na ang kapulisan ug kini ang may kalabutan sa gun for hire.
Wala na gidetalye pa sa opisyal ang dugang impormasyon sa kaso tungod nagpadayon matud pa ang gihimo nga imbestigasyon.
Gikumpirma sa opisyal nga usa kini sa gihisgutan sa pagpatawag ug tigum nga gitambungan sa mga hepe sa presento lakip ang uban nga departamento susama sa intelligence unit aron tutukan ang mga pagpamusil nga natigayon.
Kahinumduman nga daghang pagpamusil ang natigayon sa sentro sa syudad nga walay kasulbaran hangtud karon.
Apil dinhi ang pagpusil kang Kagawad Mamalumpong nga natigayon sa Barangay North ning syudad nakalabay nga bulan.
