GENERAL SANTOS CITY – Nagpadayon ang pursuit operisyon sa kapulisan sa Polomolok sa duha pa ka suspek nga kauban sa namusil sa kapulisan sa gimontar nga checkpoint sa Lumakilm Polomolok.
Kini human napusilan patay sa kapulisan kagahapon ang usa ka lalaki nga nagpabilin nga wala pa nailhan.
Matud ni Police Sr. Insp. Romeo Albano nga walay identification ang suspek luyo nga nakuhaan kini ug slingbag nga adunay duha ka sachet sa shabu, usa ka 357 revolver.
Nakaangkon ug samad sa dughan ug ulo ang suspek nga naa karon sa usa ka punerarya.
Kahinumduman nga nagbutang ug checkpoint ang kapulisan sa pagpanguna ni Chief Insp. Alex Orcajada human makadawat ug impormasyon nga may muagi nga armado sa barangay Lumakil.
Miabut matud pa ang pula nga motorsiklo nga adunay tulo ka mga lalaki ang sakay ug mikanaug ang usa ug dayon namusil gamit ang 357 revolver dihang mibalos ang kapulisan naigo ang suspek.
Ila pa kining gidala sa hospital apan gideklara kining dead on arrival.
Wala usab gikumpirma sa kapulisan kung adunay kalabutan ang mga suspek sa pagpamusil sa deputy chief of police sa nahisgutang lugar.
