Gikondena sa pipila ka mga senador ang usa ka AI-generated video nga gipagawas sa usa ka media outlet nga nakabase sa China, nga naghulagway matod pa sa mga Pilipino isip mga unggoy may kalabotan sa isyu sa 2016 Arbitral Award sa West Philippine Sea.
Sumala kang Senate President Sherwin Gatchalian, walay espasyo ang rasismo ug pagpaubos sa dignidad sa tawo bisan pa og adunay panaglalis tali sa mga nasod.
Giawhag usab niya ang tanang media ug mga institusyon nga mahimong responsable ug magpasiugda sa matinahuron ug propesyonal nga pagbalita. Samtang, matud ni Senador Francis “Kiko” Pangilinan, klaro nga rasista ug makainsulto ang maong video.
Nanawagan siya sa gobyerno sa China nga ipatangtang dayon ang video, mangayo og pasaylo sa publiko, ug papanubagon ang mga responsable sa paghimo ug pagpagawas niini.
Samtang, gipasiugda ni Senate Majority Leader Migz Zubiri nga dili angay nga moabot sa rasismo ug pagpakaulaw ang dili pagsinabtanay may kalabotan sa West Philippine Sea.
Matud niya, magpadayon ang Pilipinas sa pagpanalipod sa iyang mga katungod pinaagi sa balaod, kamatuoran, ug diplomasya.
