GENSAN – Grabeng kabalaka ang gipadayag ni Engr. Manuel Fortunato Yaphockun, usa ka negosyante sa siyudad, tungod sa walay hunong nga brownout nga nakaapekto dili lamang sa sektor sa negosyo kundili apil usab sa kinabuhi sa ordinaryong katawhan.
Matud niya, ang epekto niini dakong perwisyo sa mga negosyante, labi na sa mga nagasalig sa kuryente alang sa ilang operasyon.
Gibutyag ni Yaphockun nga gawas sa brownout, usa usab ka dakong problema ang pagsaka sa bayranan sa kuryente.
Matud niya, lisod daw dawaton nga mahal ang kuryente apan dili kasaligan ang suplay.
Nanawagan si Yaphockun sa mga opisyal sa siyudad ug sa pamunuan sa SOCOTECO 2 nga mangita dayon og klaro ug lig-ong solusyon bahin sa problema.
Kung makasiguro lamang ang SOCOTECO 2 nga dili na magbalik-balik ang brownout, andam si Engr. Yaphockun nga modawat ug mobayad sa mas dako nga bayranan sa kuryente, basta sigurado ang maayong serbisyo.
