GENERAL SANTOS CITY – Gikumpirma ni P/C/Insp. Marcelo Mendoza, hepe sa Maasim Municipal Police Station nga nakabalik na sa ilang pinuy-anan ang 96 apektadong pamilya human nga mihikling dihang natigayon ang bakbakanay sa bukid nga bahin sa Lumasal Maasim Sarangani Province.
Kini human nga naghatag ug ‘go signal’ ang kasundalohan nga mahimo ng makabalik ang mga namakwit sa ilang panimalay nga kasagaran taga Sitio Tubok human ang clearing operation nga gipahigayon sa lugar.
Gibutyag ni Mendoza, matag pamilya ang gitunolan sa Municipal Social Welfare and Development Office og food packs.
Sa iyang pahayag, wala pay gihatag nga official report ang militar sa ilang buhatan may kalabotan sa ihap sa nasamdan o namatay sa engkwentro tali sa tropa sa 27th IB Phil. Army aging adlaw.
Nakasugat matud pa sa mga sundalo ang 50 armadong lalaki sa rebeldeng grupo nga Platoon Brigol nga gipangunahan matud pa ni Kumander Brigol.
Kini nagresulta sa duha ka hugna nga bayluanay ug buto sa armas nga nagresulta sumala pa ni Maasim Mayor Utoh Salem Cutan nga adunay tulo ang patay samtang gibanabanaang daghan ang samdan .
