GENERAL SANTOS CITY – Padayon pa nga giimbestigahan sa kapulisan ang nahitabong pagpamusil sa Purok Spring Mudia, Zone B, Brgy Labangal ning syudad kung asa usa ang patay og usa ang samaron.
Matud ni PCapt. Dave Diaz, labaw sa Makar Police Station, ang namatay giilang si Princess Talosan, 17 anyos, Grade 9 student sa Lanton High School sa Brgy. Apopong nga taga Purok Mudia Extension, Brgy. Labangal og Jay Claro Rom, 35, minyo, taga Purok 2, Lanton, Apopong.
Gibutyag niini, ilang girespondihan ang report kalabotan sa pagpamusil og pag-abot sa lugar nakita usa ka bakanteng luna ang patay nga lawas ni Princess may samad sa liog og agtang.
Sa ilang imbestigasyon, una ang insidente, nangayo og tabang si Princess hinungdan gitabangan ni Rom.
Apan mibutho ang suspek og gipusil kini igo sa apapangig. Hinuon nakadagan si Rom palayo sa lugar og nakapangayo og tabang.
Nakadagan usab si Princess apan nakorner sa usa ka bakanteng luna hinungdan naabtan sa suspek og gipusil sa liog og agtang hinungdan sa hinanaling kamatayon.
Si Rom ang nadala sa ospital og padayong giobserbahan.
Ang suspek paspas misibat paingon sa Purok Pendatun.
Narekober sa crime scene ang tulo ka cartridges sa gituohang caliber. 45 pistol.
