GENERAL SANTOS CITY – Gipanghimakak ni Gensan Mayor Lorelie Pacquiao nga gadawatan ug 20% nga kickback gikan sa matag proyekto nga tukuron sa syudad.
Gihagit sa Mayor ang kinsa mang nagpagawas sa maong pasangil nga magpakita og mga ebidensya. Matud ni Mayor Pacquiao, ang pamilyang Pacquiao adunay sobra-sobra nga blessings busa dili nila kinahanglan ang mangayo gani sila pa ang nagapanghatag sa mga tawo og nangita og mga pamaagi aron makatabang.
Sa pahayag sa nasampit, gibuhat-buhatan siya ug istorya aron madaut apan wala nagpa-apekto tungod siya mismo ang nakabalo nga walay korapsyon nga natigayon sa iyang administrasyon.
Dugang ni Mayor Pacquiao nga ang pinaka-purpose niya mao ang pagserbisyo sa katawhan sa GenSan nga may kahadlok sa Ginoo.
Kahinumduman nga sa gipahigayong presscon sa kaatbang nila nga partido nga mao ang RCRI, gianunsyo ang ilang katuyoan nga magpapili sa 2025 elections.
Dinhi gikan usab mismo sa pahayag ni Vice Mayor Rosalita Nuñez ang mga pulong nga dili tantong korap ang administrasyon.
Apan matud ni Mayor Pacquiao nga dili maayo nga magpatawag lang og presscon aron dauton ang ubang politiko nga unta paghan-ay kung unsa ang mga plano aron mubalik sa serbisyo.
