Gikompirma ni Baguio City Mayor Benjamin Magalong nga siya giimbitahan aron mahimong usa sa mga adviser sa independent commission on infrastructure nga gitukod aron mosusi ug motutok sa kalig-on, kaayo ug transparency sa mga dagkong proyektong pang-imprastraktura sa nasud.
Sumala ni Magalong, iyang giila nga usa kini ka dako nga responsibilidad ilabina nga daghan nang isyu sa anomalya ug korapsyon nga naglibot sa sektor sa public works.
Gidugang pa niya nga iyang ihatag ang tanang masaligan nga kasinatian ug kaalam sa pagdumala ug pagpatuman sa mga reporma aron masiguro nga ang mga proyekto makahatag og tinuod nga benepisyo sa mga katawhan ug dili mahimong instrumento sa pagpangwarta sa pipila.
Matud pa ni Magalong, andam siyang motabang nga maestablisar ang mas lig-on nga sistema sa monitoring ug evaluation aron malikayan ang mga overpricing, substandard nga trabaho, ug ang padayong pag-usik sa pundo sa gobyerno.
