Malinawon sa kinatibuk-an ang Mayo 12 National ug Local Elections, base sa assessment sa Philippine National Police (PNP).
Sa giluwatang pamahayag sa PNP human sa pagtak-op sa mga botohan, gipahayag niini nga sa kinatibuk-an malinawon ang botasyon ug walay mga dagkong insidente nga gitaho sa tibuok nasod.
Matod sa PNP, pinaagi sa hugot nga koordinasyon sa Commission on Elections (COMELEC) ug uban pang ahensya, malampuson nga natuman ang mandato niini sa pagmonitor ug pagpanalipod sa tingog sa katawhan.
Ubos sa mabinantayon nga mata sa PNP, gimonitor lamang niini ang mga ginagmay nga technical ug logistical issues sama sa pagkaguba sa Automated Counting Machines (ACMs), pagkalangay sa pag-abli sa mga presinto, ug kalisod sa pagpangita sa mga ngalan sa mga botante sa listahan, mga butang nga gitubag usab dayon sa mga awtoridad.
Walay usa niini nga mga insidente ang naghatag ug hulga sa seguridad o nakaapekto sa hapsay nga dagan sa piniliay, matod sa nasudnong kapolisan.
Base sa record sa kapulisan, niabot sa 205,136 ka mga government personnel ang gipakatap sa tibuok nasod, apil ang 163,621 gikan sa PNP, 3,698 ang nadestino isip Special Electoral Board members, ug 37,817 augmentation forces gikan sa AFP, Philippine Coast Guard (PCG), Bureau of Fire Protection (BFP), ug uban pang partner agencies.
Natubag usab sa kapolisan ang mga gikatahong kalapasan sa liquor ban ug giingong vote buying, nga padayon pa nga giimbestigahan.
Si PNP Chief, Police General Rommel Francisco D. Marbil, midayeg sa tanang police units ug partner agencies sa ilang dedikasyon ug disiplina sa pagtuman sa ilang mga katungdanan sa eleksyon, matud niya.
Matod sa kadagkoan sa PNP, kining maong kadaugan dili lang sa pagpatunhay sa kalinaw sa adlaw sa piniliay kondili alang kini sa pagdepensa sa katungod sa matag Pilipino nga gawasnon ug walay kahadlok nga mopili sa ilang mga lider.
Nagpabiling full alert ang PNP samtang nagpadayon ang canvassing ug proklamasyon sa mga mananaog nga kandidato.
Giawhag usab sa kapolisan ang publiko nga i-report dayon ang bisan unsang kadudahang kalihokan ngadto sa opisyal nga hotlines ug communication platforms sa PNP
